Потписи во Крушево за Спомен-куќа на Тоше

Потписи во Крушево за Спомен-куќа на Тоше

Родниот град на големата ѕвезда се обидува што подостоинствено да го чува споменот на момчето кое прерано го напушти овој свет.

Група граѓани од Крушево формираа Иницијативен одбор, кој преку соопштение порачува дека бара поддршка за што побрзо расчистување на имотно-правните односи за стариот објект „Мотелче“ на месноста Гумење.

„Сакаме, конечно, осум месеци по трагичната смрт на Тоше Проески да се започне со изградба на спомен-куќата на соодветна локација, со цел да се овековечи ЛИКОТ И ДЕЛОТО на Тоше во интерес на градот Крушево и на Република Македонија“, се вели во соопштението.

Одборот бара поддршка од граѓаните и од надлежните институции, а ќе биде покрената и акција за собирање потписи во Книга за поддршка, која од 5 до 16 јуни ќе се наоѓа до Столбот на Републиката (во центарот на градот) и покрај неговиот вечен дом, секој ден во периодот меѓу 9.00 и 13.00 часот. На 16 јуни Книгата за поддршка ќе биде доставена до државните институции.