Фондацијата „Тоше Проески“ ќе стипендира млади музички таленти

Фондацијата „Тоше Проески“ ќе стипендира млади музички таленти



КРУШЕВО - Меѓународната фондација „Тоше Проески“, чиј основач е семејството, а претседател Никола Проески, татко на трагично загинатата поп-икона, вчера во Крушево ги промовира програмските активности со единствена цел да ја продолжат богатата хумана дејност на мегаѕвездата, неговото дело и аманет да им се помага на сите. Фондацијата, како што беше речено, промовирајќи ја музиката на Тоше, ќе дејствува во духот на вербата во Бог и следење на двете најголеми христијански заповеди: да се љуби Бог и да се љубат луѓето.

„Тоше го сакаше Бога со сето свое срце, сета своја душа и со сиот свој разум. Тоше ги сакаше и сите други како и самиот себеси. Тоа се двете најголеми заповеди според Библијата, тој ги практикуваше, а тие беа зборовите кои со Тоше беа разменети при заедничката молитва на Молитвената вечера, организирана од Меѓународната фондација ’Борис Трајковски‘, лани на овој ден кога се роди зачетокот на идејата за Фондацијата по примерот на другите светски ѕвезди“, потсети Стевче Дечев, еден од единаесеттемина членови на Управниот одбор на Фондацијата, формирана во декември минатата година.

Во УО на Фондацијата, покрај таткото на Тоше, членуваат и неговиот зет Славен Ристески, Стевче Дечев, Ерол Ризаов, Илија Ивановски, Лефкија Гажоска, академик Таки Фити, Кочо Моцан, Елизабета Канческа-Милевска, Сашо Митков и Христо Христоски. За претседател на Надзорниот одбор е избран Христо Николоски, а контрола врз финансиското работење на Фондацијата ќе имаат мајката на Тоше, Доминика, и сестрата Дора Проеска-Ристеска.

Според извршниот директор Андреј Николоски, седиштето на Фондацијата ќе биде во Крушево, а ќе функционираат две отворени канцеларии во Крушево и во Скопје кои треба да реализираат бројни програмски и проектни активности. Во тек е и изработка и на Интернет-страница www.fondacijatoseproeski.org.

„Фондацијата има цел и да стипендира млади музички таленти, но и да остварува блиски контакти со фановите на Тоше. Затоа ќе бидат основани клубови во повеќе градови и држави, планирано е да се одржуваат балкански и меѓународни каравани за промоција на делото на Тоше, хуманитарни концерти, семинари, тркалезни маси, симпозиуми, работилници, тренинг-обуки, конференции и трибини, активности за промоција на здрави животни стилови кај младите, промоција на македонската музика и култура во светот, како и инволвирање на Фондацијата во европски и светски хуманитарни програми и програми за развој на мирот, музичката култура, волонтерството и корисното пополнување на слободното време на младите со неформална едукација“, вели Николоски. Тој потенцира дека оваа фондација веќе презеде конкретни активности за помош на социјално загрозените семејства, пред се', во Крушево и Крушевско.

Формирањето на Фондацијата, всушност, значи остварување на уште една планирана задача на Координативното тело за заштита на ликот и делото на Тоше Проески. „На 10 март ќе заврши меѓународниот конкурс за идејно архитектонско-урбанистичко решение за изградба на спомен-куќа на Тоше во родното Крушево со средства од Министерството за култура. Потоа ќе се формира жири-комисија што ќе го избере најдоброто идејно решение“, изјави Елизабета Канческа-Милевска, претседателка на Координативното тело. Таа најави и дека Министерството за култура ќе преземе активности за установување нова музичка манифестација во чест на Тоше со меѓународен карактер.

На 15 март, пак, ќе заврши и тендерот што го објави Министерството за транспорт и врски, а до крајот на март ќе започне изградбата на локалниот пат до манастирот „Свето Преображение“, што беше една од желбите и неостварените планови на Тоше