Закочена изградбата на Спомен куќата на Тоше

Закочена изградбата на Спомен куќата на Тоше

„Потпис за незаборав“. Под ова мото денеска Иницијативниот одбор составен од граѓани на Крушево ја започна иницијативата за собирање на потписи.

Ќе ги достават до Владата како изразување на нивниот револт за закочувањето на изградбата на Спомен куќата на Тоше која треба да се гради на просторот кај стариот хотел на Гумење.

Тие велат Тоше најмалку заслужи ваков игнорантски однос од институциите.

„Ние сме револтирани на еден начин, што после осум месеци никој ништо не презема во градот. Акцијава не е против никого насочена, ни против газдата на тој објект, ни против никого, туку да ги поттикнеме институциите да се реши тој проблем таму и што побрзо да почне изградбата на Спомен куќата“, рече Никола Ќурчиев, член на иницијативен одбор.

Целиот проблем се состои во тоа што сега, како сопственик на мотелот кој не работи со децении, се јавува сопственикот на хотелот „Монтана“, кој неофицијално бара 100.000 евра за негово ослободување.

„Имајќи предвид дека тој објект горе е руиниран и не би сакала да си земам за право да давам некои паушални проценки, меѓутоа таа проценка како сума на пари којашто кружи во јавноста, навистина не вреди за тој објект“, изјави Лефкија Гаџоска, градоначалник на Крушево.

Инаку, во тек е судскиот спор за тоа кој е сопственик на објектот помеѓу Историскиот музеј „Крушево“ и сопственикот на „Монтана“.

Од Историскиот музеј изјавија дека и тие имаат голем дел од сопственоста врз овој објект и затоа трае судскиот спор помеѓу нив и сопственикот на „Монтана“.

И граѓаните кои денеска масовно се потпишуваа во книгата велат државата да реагира што е можно под итно.

„Сметаме дека треба Владата побргу да реагира и да се најде начин да се почне со изградбата на Меморијалниот центар“, вели Анастас Тана, жител на Крушево.

„Луѓето што се одговорни да побрзаат малце, а тој заслужува и повеќе од тоа“, рече Вангел Пажек, жител на Крушево.

Сопственикот на „Монтана“ Пецо Пановски денеска не сакаше да даде коментар, а од Министерството за култура соопштија дека откако ќе се реши судскиот спор и откако ќе биде направен главниот проект за Спомен куќата, точно ќе се знае кога ќе започне изградбата.