Експертите го расклопија туарегот на ТошеСрпскиот весник "Курир" не се откажува од приказната дека Тоше е убиен. Според нив, неисправни биле сопирачки на "туарегот". Наводниот "убиец" имал можност да го оштети автомобилот на Тоше или во Скопје пред патувањето или во Хрватска.
Вештачењето на Туарегот во кој загина македонската поп-икона Тоше Проески е започнато, велат од Основен суд Скопје 1. Според истражниот судија Седат Реџепагиќ, раководител на истражното одделение, стручниот тим бил формиран уште минатата недела, а експертите од денес веќе работат на проверка на возилото. Со вештачењето, кое се спроведува по барање на истражниот судија кој ја води истрагата Велче Панчевски, треба да се утврди брзината со кое се движело возилото во моментот на несреќата и евентуалните дефекти на возилото. Во тимот кој ја врши експертизата се професори од Машинскиот факултет, Сообраќајниот факултет од Битола, претставници на судско-обвинителските власти, стручно лице од крим-техника при МВР.
Мирослав Вујиќ, адвокатот на Ѓорѓи Ѓорѓевски, пријателот на Тоше, кој го возеше "туарегот" дента кога се случи несреќата вчера немаше информација дека вештачењето е започнато, бидејќи очекува тој да биде поканет да присуствува на експертизата.
Српскиот весник "Курир", пак, не се откажува од приказната дека Тоше е убиен. Според нив, најверојатно загинал поради неисправни сопирачки на "туарегот" со кој се возел. Иако Министерството за внатрешни работи на Македонија ги демантираше информациите дека токму тие барале дополнителна експертиза на џипот, тие новото вештачење го поврзуваат со наводното барање од страна на МВР, а притоа се повикуваат на потврда од адвокатот Мирослав Вујиќ.
"Џипот е на Машинскиот факултет во Скопје. Стручниот тим ќе го повтори вештачењето и ќе го расклопи возилото. Жал ми е што такво детално вештачење не беше направено уште во Хрватска, бидејќи со тоа се оствари простор за разни претпоставки, изјавил Вујиќ, кој најавува дека лично ќе присуствува на вештачењето на "туарегот" во кој загина Тоше Проески.
Српски "Курир" повикувајќи се на анализите од хрватските медиуми ги објави и начините на кои наводниот "убиец" имал можност да го оштети автомобилот на Тоше.
- Тоа би можело да се направи или во Скопје пред патувањето или во Хрватска. Возачот Ѓорѓески стоел на бензинска пумпа пред влезот на Хрватска за да се напие кафе. Тоше останал да спие на предното седиште, а во "туарегот" останала и неговата менаџерка, стои во српски "Курир".
Македонското МВР за српскиот медиум посочува дека се што се работи на џипот, се работи по налог на истражниот судија. "Курир" пред два дена објави пак дека хрватската полиција ја известила македонската полиција за можностите сообраќајната несреќа во која загина Тоше да е намерно предизвикана, поради што од МВР го побарале возилото за повторна експертиза.