Избрано идејно архитектонско решение за спомен-куќа на Тоше Проески

Избрано идејно архитектонско решение за спомен-куќа на Тоше Проески

Идејното архитектонско решение за изградба на спомен-куќа за Тоше Проески на Гумење кај Крушево е едногласно избрано меѓу десетте пријавени труда на меѓународниот конкурс што го распиша Министерството за култура.

Автори се архитектите Дејан Секуловски и Дејан Спасеновски и соработникот Илија Божиновски. Предвидено е објектот да биде во форма на крст и да зафаќа површина од околу 870 метри квадратни.

Целта е меморијалниот центар постојано да биде посетуван и во него да бидат сместени сите значајни работи поврзани со животот и кариерата на најголемата македонска музичка ѕвезда. Во спомен-куќата ќе биде пренесена собата на Тоше во Крушево, музичкото студио, сите предмети од куќата во Злокуќани, неговиот омилен автомобил „буба“, неговата облека, предмети, награди и икони.

За најмалку два до три месеца треба да биде готово главното решение за градба на објектот, за кој има согласност и од семејството на Тоше. Потоа ќе следува и тендерот за изградба. Од буџетот за 2008 за спомен-куќата се одвоени осум милинои денари, но вкупната финансиска конструкција на проектот ќе зависи од финалното решение.

Од десетте труда пристигнати на конкурсот, еден бил меѓународен. За избраниот одлучила деветчлена комисија под претседателство на дипл. инж. Кристинка Радески.